நவீன விஞ்ஞானத்தின் போக்கும், எதிர் கொள்ளும் சவால்களும் | சிந்துஜன் – 34ம் அணி

மனித குலம் எதிர்  நோக்குகின்ற சவால்கள், பிரச்சனைகள், போராட்டங்கள் என்பவற்றைத் தீர்ப்பதற்காகவும் மக்களின் தேவையையும், விருப்பையும் நிறைவு செய்வதற்காகவும், நாடுகளிடையேயான பலத்தை நிர்ணயிப்பதற்காகவும் விஞ்ஞானமானது யுகம் யுகமாக விருத்தி செய்யப்பட்டது.

விஞ்ஞானத்தின் வளர்ச்சியினால் சாத்தியமற்றன எனக் கருதப்பட்ட பல நேற்றைய கற்பனைகள் சாத்தியமாகின. மனிதனின் நீடித்து நிலைத்த வாழ்விற்கு விஞ்ஞானத்தின் பங்கு அபாpமிதமானது.

இவ் விஞ்ஞானத் தகவல் தொழிநுட்ப வளர்ச்சியால் சுருங்கி விட்ட உலகம், எளிதாகிவிட்ட விண்வெளிப் பயணங்கள், மனித வாழ்வை இலகுவாக்கி விட்ட புதிய கண்டுபிடிப்புக்கள், முறியடிக்கப்பட்ட மனித வாழ்விற்கான சவால்கள், எல்லைகளற்ற பரந்த சிந்தனை என விஞ்ஞானத்தின் ஒரு முகமும் சூழல் மாசடைதல், பேரழிவு ஆயுதங்கள், அதிகரித்துவிட்ட நோய் நிலைமைகள், மனித மனங்களில் ஏற்பட்டிருக்கின்ற பிறழ்வுகள் என விஞ்ஞானத்தின் மறுமுகமும் விஞ்ஞானத்தைப் பற்றிச் சிந்திக்கும் போது நிழலாடுகின்றது. ஆக மொத்தத்தில் இன்றைய விஞ்ஞானம் சாதித்துவிட்ட சாதனைகளும், ஏற்படுத்திக் கொண்டிருக்கும் சவால்களும் ஒரு சமாந்தரமான வளர்ச்சிப் போக்கை காட்டுகின்றன.

இன்றைய விஞ்ஞானம் ஏற்படுத்துகின்ற சவால்களே நாளைய எதிர்காலச் சந்ததி எதிர்கொள்ளப்போகும் மிகப் பெரிய சவாலாகவும் மாறக்கூடும். ஒரு புறம் மனித வாழ்வை இலகுவாக்கி குறுகிய கால நன்மைகளை கொடுக்கின்ற விஞ்ஞானம் மறுபுறம் நாளைய எதிர்கால தூரநோக்கிலான சவால்களை அள்ளி வழங்குகின்றது.

இன்றைய உலகின் போக்கில் அபாயகரமான போட்டித்தன்மையான அல்லது தன்னுடைய வல்லாதிக்கத்தை ஒவ்வொரு நாடும் நிலைநிறுத்துகின்ற ஒரு போட்டிக் களமாக உலகம் மாறிவருகின்றது. இந்தக் களத்திலே ஒவ்வொரு நாடும் தம் ஆதிக்கத்தை நிலைநிறுத்துகின்ற ஆயதமாக அல்லது கருவியாக விஞ்ஞானம் விளங்குகின்றது.

ஒரு காலத்தில் உணவிற்கான போட்டி, இருப்பிடத்திற்கான போட்டி, சமய சித்தாந்தங்களிற்கான போட்டி, முதலாளித்துவ கொள்கைகளிற்கான போட்டி, வாணிபத்திற்கான போட்டி என்று ஆரம்பித்த நாடுகளிடையே போராட்டங்கள் இன்று ஒரு புதிய அத்தியாயத்தை நோக்கி நகருகின்றன.

அதுதான் தொழிநுட்பம் சார்ந்த விஞ்ஞானத்தின் பெயரிலான மறைமுக யூத்தம். இன்றைய கால கட்டத்தில் நவீன போரியல் யுக்திகளில் நாடுகளிடையே நிலவும் ஆதிக்கப் போட்டியின் உச்சக் கட்ட போராட்டக் களமாக விண்வெளி சார் ஆய்வுகள் விளங்குகின்றன.

விண்வெளியில் தனது நாட்டை நிலைநிறுத்தி அங்கும் தன் அரசியல், பொருளாதார நிலைநிறுத்தலை ஏற்படுத்தி அதி தொலை தூர நோக்கில் உலக நாடுகள் இயங்க ஆரம்பித்துவிட்டன. அதே போல கண்டம் விட்டு கண்டம் பாயும் ஏவுகணைகள், அணுஆயுதங்கள் என அறிவியல்துறை இன்று கொடிகட்டிப் பறக்கின்றது. ஒவ்வொரு நாடும் தன் அறிவியல், பொருளாதார பலத்திற்கேற்ப இயன்றவரை தன்னை தொழிநுட்பத்தில் உயர்த்த முனைகின்றன.

111-21நவீன விஞ்ஞானமானது பல்வேறுபட்ட தளங்களில் மருத்துவம், இலத்திரனியல், பொறியியல், தொடர்பாடல், மூலக்கூற்றியல், விவசாயம் என ஒவ்வொன்றிலும் புரட்சியை ஏற்படுத்த தவறவில்லை. நவீன விஞ்ஞான பரிசோதனை முறைமைகள் இசத்திரசிகிச்சை வசதிகள், கதிர்வீச்சு முறைமைகள், நுண்ணுயிரியல் கண்டுபிடிப்புக்கள், மரபணு கலப்பாக்கம், குளோனிங் முறைமைகள், நவீன விவசாய யுக்திகள், தொழிநுட்ப ரீதியான கண்டுபிடிப்புகள், இணைய வசதிகள், அதிவேக போக்குவரத்து சாதனங்கள், எல்லா ஊடகத்தினுடும் (கடல், தரை, ஆகாயம்) பயணிக்கும் வாகனங்கள், மூலக்கூற்று ரீதியான கல்வி முறைமை, இலத்திரனியல் கண்டுபிடிப்புக்கள் எனப் பரந்துபட்ட அனுகூலங்களை வழங்கத் தவறவில்லை. தகவல் தொழிநுட்பத்தால் உலகமே சுருங்கி கிராமமாகிவிட்டது. நவீன மருத்துவ வசதிகள் பல்வேறு நோய்களை நீக்கி ஆரோக்கிய வாழ்வை வழங்குகின்றன. நவீன விவசாய முறைகள் அதிகூடிய அறுவடையை வறட்சியை தாங்கக்கூடிய தாவர வா;க்கங்களை அறிமுகப்படுத்தியிருக்கின்றன. நவீன இலத்திரனியல் சாதனங்கள், இணைய வசதிகள், கல்வி முறைமைகள் என உலகம் ஒரு புதிய தளத்தில் நடைபோடுகின்றது.

நவீன விஞ்ஞானம் காட்டி நிற்கும் வளர்ச்சி மனிதனை உச்ச விருத்தியுற்ற ஒரு உயிரினக் கூட்டமாக வகைப்படுத்துகின்ற போதும் அது ஏற்படுத்தியுள்ள பிரதி கூலங்கள், சவால்கள் புறக்கணிக்கத்தக்கதல்ல. வல்லமையும், அனுகூலமும் தரும் விஞ்ஞானத்தின் ஒரு முகமும், கொடூரமும் பேரழிவுகளும் தருகின்ற விஞ்ஞானத்தின் மறு முகமும் உலகை திடுக்கிட வைக்கின்றது.

அணுஆயுதத்தின் பிரயோகத்தினால் சிதைந்துபோன ஹிரோஷிமா, நாகசாகி எனும் இரு பெரு நகரங்களின் வரலாறு, அங்கு வாழ்ந்து வந்த மக்களின் கொடூர அழிவு இன்று வரை சந்ததி சந்ததியாக பாதிக்கப்படும் அப்பாவிச் சிறு பாலகர்கள், வளமற்றுப்போன நிலம், தாவரங்கள் முளைவிடக்கூட வளமற்றுப் போனதாகி நிற்கின்றது.

images (11)இந் நிகழ்வு எவ்வளவோ தியாகங்கள், அர்ப்பணிப்புகளுடன் தாம் வகுத்துக்கொண்ட இலக்குகளிற்காக தம்மையே ஒறுத்து விஞ்ஞானிகள் நிகழ்த்திய அற்புத அறிவியற் புரட்சியை ஒரு கணத்தில் வெறுக்க வைக்கின்றது. இன்று அணுஆயுதங்கள் ஒரு நாட்டின் வல்லமையை பறை சாற்றும் ஒரு ஆயுதமாக மாறியுள்ளது. அணுஆயுதத்தின் விரைவான நாடுகளிடையேயான பரவல், கைத்தொழில் உற்பத்திகளின் விளைவான சூழலியல் மாசுபடுதல், ஓசோன் படையின் மெலிவடைதல், பச்சைவீட்டு விளைவு, மாறுபட்ட காலநிலை, மனித மனங்களின் நவீன வாழ்க்கை முறையிலான மன அமைதியின்மை, அதிகரிக்கும் தற்கொலைகள், கட்டுப்படுத்த முடியாத ஆட்கொல்லி நோய்கள், பேரழிவு தரும் ஆயுதங்கள், உயிர்ப் பல்வகைமை குன்றுதல், தொடரும் காடழிப்புகள் என விஞ்ஞான தகவல் தொழிநுட்பத்தின் விளைவான சவால்கள் நவீன மனிதனின் முன்னால் இருக்கின்றன.

தன்னை தர்க்கரீதியான, புலமை ரீதியான வல்லவனான மனிதன் தான் வெட்டும் குழியுள் தானே வீழ்ந்து மடியும் கொடூர நிலையாக மேற்படி சவால்கள் அமைகின்றன. இந்த சவால்களை முறியடிப்பது மிக கடினமாக அமைந்தாலும் இது தொடர்பான விழிப்புணர்வு அதிகரிக்குமிடத்து வெற்றிகரமாக முறியடிக்கப்படலாம். அணுஆயுத பரவல் தடைச் சட்டத்தை இறுக்கமாக்கி பாகுபாடின்றி நடைமுறைப்படுத்தல். கைத்தொழிற்சாலை உரிமங்களை வருடா வருடம் புதுப்பித்தலும் தொடர்ச்சியான கண்காணிப்பிற்கு உட்படுத்துதலும், காட்டு மீள் வளர்ப்பு முறைமை, அபிவிருத்தி பணிகளிற்கென பிரத்தியேகமான வெட்டுமரக்காட்டு உருவாக்கம், பேரழிவு ஆயுதப் பாவனைத் தடை, புத்திஜீவிகள், சூழலியலாளர்கள் மட்ட விழிப்புணர்வு மாநாடுகளை நடத்துதல், தனி மனித ஒழுக்கம்,  தனி மனித மனமாற்றம், ஆன்மீக ஒழுக்க சிந்தனைகளை வளர்த்தெடுத்தல், என பரந்துபட்ட தீர்வுகளை மேற்கொள்ளலாம்.

எனவே விஞ்ஞானத்தின் சரியான பாவனை அல்லது சரியான திசையை நோக்கிய நகர்வு உலகின் தொடர்ச்சியான நிலவுகைக்கு துணைநிற்கும்.

விஞ்ஞானத்தின் தகவல் தொழிநுட்பத்தின் வளர்ச்சியால் விளையும் பிரதிகூலங்களை இயன்றவரை குறைத்து மனித இனத்தின் முன்னேற்றத்தையும், நாளைய எதிர்கால சந்ததியின் நிலவுகையையும் கருத்திற்கொண்டு மேற்கொள்ளப்படும் கண்டுபிடிப்புக்கள் இவ் உலகிற்கு மேன்மையையும், அனு கூலங்களையும் நிறைவாக வழங்கி நிற்கும் என்பதில் ஐயமில்லை.

வை. சிந்துஜன்  – 34ம் அணி


 

The Cover Page of Naadi -12

The Cover Page of Naadi -12

This article by S. Sinthujan, (34th Batch), appeared in the MSU Magazine - "Naadi - 12" published in December 2014

Editor MSU

Editor of MSU

You may also like...

Leave a Reply