உள நலம் சிறக்க | சாகித்யா – 33ம் அணி  

அதிகாலையில் எழும்பும் போதே அன்றைய நாளுக்குரிய வேலைச் சுமையை எண்ணியபடியே எழும் ஒவ்வொருவருக்கும் பதகளிப்பு என்பது இயல்பான வாழ்வியல் அம்சமாக மாறிவிட்டது. இது போன்றே பள்ளி செல்லும் சின்னம் சிறார்களும் நித்திரை விட்டு எழுந்ததும் காலைக்கடன் கழிப்பது முதல் பள்ளி சென்று வகுப்பறைக் கற்றலை நிறைவு செய்யும் வரை மன அழுத்தம் தொடர்தல் இயல்பு வாழ்கையாக மாறிவிட்டது. காரணம் சமூகத்தின் அசைவியக்கமானது துரிதமடைந்து வருவதே. இதனால் இன்று உளமருத்துவர்களது கவனமும் பணியும் உளநலம் தொடர்பாகவே ஈர்க்கப்பட்டுள்ளது.

உளநலம் என்பது ஆரோக்கியமான வாழ்வியலுடன் தொடர்புடையது என வரைவிலக்கணப்படுத்தலாம். ஆரோக்கிய வாழ்வு என்பது ஆரோக்கியமான சூழலில் இருந்து எழுகின்றது. எனவே ஒருவரது உளநலத்தை தீர்மானிப்பதில் பரம்பரைக் காரணி என்பதை விட சூழற் காரணிகள் பலமாக செல்வாக்குச் செலுத்துகின்றன. குழந்தை உளவியலாளரும் அறிகை உளவியலாளருமான ஜெரோம் புறூனர் கற்றல் மேம்பாடு என்பது கற்போனின் உளநிலையைப் பொறுத்தது எனக் குறிப்பிடுகின்றார். இதனையே Backels & wheeler (2001) என்பவர் கற்றலின் வெற்றி தோல்வி என்பது நிச்சயமாவது மாணவனது உளநலத்திலேயே தங்கியுள்ளது. எனவே தான் பிள்ளை விருத்தி உளவியலில் உளநலத் தேவைகளை எவ்வாறு பிள்ளையின் உருவாக்கத்துக்கு வழங்க முடியும் என்பதை குறித்துரைத்துள்ளது.

Mental-Health5ஒரு பிள்ளைக்கு தேவையாக அமைவது தூய நீர் போசாக்கான உணவு, தூய காற்று ஏனைய மருத்துவ சேவைகள் என்பவையாகும். இவற்றை உரிய வகையில் வழங்க வகை செய்தல் வேண்டும். குடும்பச் சூழல் என்பது அன்பானதாகவும் ஆதரவு கொடுப்பதாகவும் ஒற்றுமையானதாகவும் புரிந்துணர்வு மிக்கதாகவும் இருத்தல் வேண்டும். அடிக்கடி மாற்றமுறாத நிலையான இருப்பிடம் கற்றல் சூழல் வேண்டும். சிறுவயதிலிருந்தே உளநெருக்கீடுகள், இழப்புக்கள், முரண்பாடுகள் நிகழக்கூடிய சந்தர்ப்பங்களை தவிர்க்க வகை செய்தல் வேண்டும். இத்தகைய தேவைகள் கிடைக்கப் பெறும் பட்சத்தில் ஆரோக்கியமான உள நலம் உடைய சிறாக்கள் சமூகத்தில் உருவாகுவர் என்பதில் ஜயமில்லை.

இதே போன்று கட்டிளமைப் பருவத்திலும் ஊழியப்படையிலும் இருப்போர் தமது உளநலம் எவ்வாறு உள்ளது என்பதை சுயமதிப்பீட்டிற்குட்படுத்தி வாழ்தல் மூலம் தமது உளநலத்தை ஆளுமைக் கோலத்தை செழுமையாக்கிக் கொள்ள முடியும். அமெரிக்க உளமருத்துவ நிறுவனம் குறிப்பிடுகின்ற கீழ்வரும் வினாக்களுக்கு உங்கள் விடைகள் ஆம் என பலமாக ஒலிக்குமாயின் நீங்கள் உளநலம் உள்ளவர் என உறுதிப்படுத்திக் கொண்டு உங்கள் பணியை தொடருங்கள். தவறின் உங்களை மென் மேலும் செழுமையாக்குதல் வேண்டும் என்பதை உணர்ந்து மாற்றத்தை உருவாக்கிக் கொள்ளுங்கள்.

உளநல மதிப்பீட்டு வினாடி வினாக்கள் சில:

  1. எனது பணியில் மற்றவரின் உதவியை அதிகம் நாடுகின்றேனா?
  2. சவால்களை துணிவுடன் எதிர் கொள்கின்றேனா?
  3. சமூக நியமனங்கள் விழுமியங்களை மதித்து வாழ முடிகின்றதா?
  4. எனது செயலில் தன்னம்பிக்கையும் விடா முயற்சியும் உண்டா?
  5. எனது முன்னேற்றதுக்காக மற்றவர்களில் தங்கி வாழ்கின்றேனா?
  6. சுயமாக சிந்தித்து தீர்மானத்தை எடுக்கும் நிலை உண்டா?
  7. தினம் மகிழ்வும் சிரிப்பும் வாழ்வுடன் இணைந்துள்ளதா?
  8. உயர்ந்த மட்டத்தில் எதிர்பார்ப்புக்களை எட்ட, செயலாற்ற முடிகிறதா?

மேற்குறித்த வினாக்களுக்கு விடையளிக்கும் ஒருவர் இல்லை என ஒன்றுக்கு மேற்பட்ட வினாக்களுக்கு விடையளித்தால் உள சமநிலைக் குறைவு உண்டு என்பதை உறுதி செய்து கொள்ள வேண்டும். உள அழுத்தம், குழப்பமான மன மூட்டம், ஞாபகம் குறைவு, அயர்வு, சோர்வு, அமைதியின்மை, ஒழுங்கற்ற நடத்தை, பொதுமைப்பட்ட பய உணர்வு என்பன தனிப்படவோ இணைந்தோ தோற்றம் பெறும். இதற்காக சார்ந்த வழிமுறைகளை எமது அன்றாட வாழ்வில் முறையாக கடைப்பிடிக்க வேண்டும். சுவாசப் பயிற்சி, யோகாசனம், அக அமைதிப் பயிற்சி தியானம், மந்திர உச்சாடனம் போன்ற பயிற்சிகளைப் பயன்படுத்தலாம். இச் செயன்முறைகள் மூலம் உடலும் மனமும் அமைதியடைய உளம் இயல்பு நிலைக்கு வரும். தவறின் உளமருத்துவர் துறையை நாடி சிகிச்சை பெறுவதன் மூலம் உளநலம் சிறக்கும்.

ரா. சாகித்யா – 33ம் அணி


The Cover Page of Naadi -12

The Cover Page of Naadi -12

This article by Ms. R. Sahithiya, (33rd Batch), appeared in the MSU Magazine - "Naadi - 12" published in December 2014

Editor MSU

Editor of MSU

You may also like...

Leave a Reply